Uhuru Kenyatta avuye i Goma aza kuganira na Min Nduhungirehe
Minisitiri w’Ububanyi n’Amahanga n’Ubutwererane, Olivier Nduhungirehe, ari kumwe n’abandi bayobozi bakuru ba Leta, yakiriye Nyakubahwa Uhuru Kenyatta, wahoze ari Perezida wa Repubulika ya Kenya akaba n’umwe mu bagize Akanama k’Abahuza k’Umuryango wa Afurika Yunze Ubumwe (AU) mu nzira y’amahoro mu Burasirazuba bwa Repubulika Iharanira Demokarasi ya Congo.
Ibiganiro byibanze ku bikorwa by’Akanama k’Abahuza ndetse n’imbaraga zikomeje gushyirwa mu guteza imbere inzira y’amahoro iyobowe n’Umuryango wa Afurika Yunze Ubumwe.
Uwahoze ari Perezida wa Kenya, Uhuru Kenyatta, n’abandi bahoze ari ba Perezida, barimo Mokgweetsi Masisi wa Botswana na Sahle-Work Zewde wa Ethiopia, bagiye i Goma muri Repubulika Iharanira Demokarasi ya Congo, aho bagiranye ibiganiro n’abayobozi b’ihuriro AFC/M23.
Ibiganiro byabo byibanze ku kibazo cy’umutekano mu Burasirazuba bwa RDC ndetse n’inzira z’amahoro zigamije gukemura amakimbirane amaze imyaka muri ako karere.
Uru ruzinduko rwari rugamije kureba intambwe imaze guterwa mu gushakira umuti ikibazo cy’umutekano mu Burasirazuba bwa RDC no gusuzuma uko inzira y’ibiganiro yashyigikirwa kugira ngo amahoro arambye aboneke mu Karere k’Ibiyaga Bigari.
Uhuru Kenyatta asanzwe afite uruhare mu bikorwa byo gushakira amahoro Burasirazuba bwa RDC, kuko yayoboye ibiganiro bya Nairobi byahuzaga Guverinoma ya RDC n’imitwe yitwaje intwaro ikorera muri ako karere.
Uhuru Kenyatta n’inzira y’ibiganiro bya Nairobi
Mu 2022, Umuryango wa Afurika y’Iburasirazuba (EAC) watangije gahunda izwi nka Nairobi Process, yari igamije gushakira umuti w’amahoro amakimbirane yo mu Burasirazuba bwa RDC.
Uhuru Kenyatta yagizwe umuhuza w’iyo gahunda, aho inshingano ze zari uguteza imbere ibiganiro by’amahoro no gukurikirana ishyirwa mu bikorwa ry’ibyemeranyijweho.
Ibiganiro bya Nairobi byari bigamije cyane cyane guhuza impande zitandukanye zirebwa n’amakimbirane, mu rwego rwo gushakira umuti wa politiki ibibazo by’umutekano n’imiyoborere byagiye bitera umutekano muke muri ako karere.
Gusa inzira y’ibiganiro ntiyatanze umusaruro wari witezwe mu gukemura burundu amakimbirane.
Abahoze ari ba Perezida bongeye kugira uruhare
Muri Werurwe 2025, EAC na SADC byafashe icyemezo cyo kwagura itsinda ry’abahuza mu biganiro by’amahoro bya RDC.
Uhuru Kenyatta yashyizwe mu itsinda ry’abahoze ari ba Perezida batanu bagombaga kugira uruhare mu gushakira umuti ikibazo cy’umutekano mu Burasirazuba bwa RDC.
Iri tsinda rikorana n’impande zitandukanye zifite uruhare mu bibazo by’umutekano mu Karere k’Ibiyaga Bigari, mu rwego rwo gushyigikira ibiganiro no gushaka inzira y’amahoro iyobowe n’Umuryango wa Afurika Yunze Ubumwe.
Uruzinduko rwa Uhuru Kenyatta na bagenzi be i Goma rubaye mu gihe hakomeje gushakwa umuti wa politiki w’amakimbirane amaze igihe mu Burasirazuba bwa RDC, aho ibiganiro n’ubuhuza bikomeje gufatwa nk’imwe mu nzira z’ingenzi zo kugera ku mahoro arambye.
