Uburundi na Amerika basinye amasezerano mu by’Amabuye y’agaciro

Mu muhango wabereye muri Minisiteri y’Ububanyi n’Amahanga ya Leta Zunze Ubumwe za Amerika, Uburundi bwashyize umukono ku masezerano mashya y’ubufatanye mu rwego rw’ubucukuzi bw’amabuye y’agaciro n’amasosiyete akomeye yo muri Amerika. Ni igikorwa gifatwa nk’intambwe ikomeye mu gushimangira ubufatanye mu bukungu hagati y’ibihugu byombi no guteza imbere ishoramari mu mutungo kamere w’Uburundi.

Aya masezerano yashyizweho umukono na Minisitiri w’Uburundi ushinzwe umutungo kamere w’amabuye y’agaciro, ingufu, inganda, ubucuruzi n’ubukerarugendo, Hassan Kibeya, wahagarariye Guverinoma y’Uburundi. Ku ruhande rw’amasosiyete y’Abanyamerika, ayo masezerano yashyizweho umukono n’abayobozi b’amasosiyete Lifezone Metals na KoBold Metals, bahagarariwe n’umuyobozi mukuru (CEO) Chris Showalter hamwe n’abanyamategeko b’ayo masosiyete.

Umuhango wabereye ku cyicaro cya United States Department of State i Washington D.C., uyobowe na Sarah Troutman, Umwungirije w’Umunyamabanga wa Leta ya Amerika ushinzwe ibibazo bya Afurika, ari kumwe n’abandi bayobozi bo mu biro bishinzwe Afurika muri iyo minisiteri.

Mu ijambo rye, Minisitiri Kibeya yavuze ko aya masezerano ari amahirwe akomeye ku Burundi mu gukoresha neza umutungo kamere wacyo, cyane cyane amabuye y’agaciro igihugu gifite ku bwinshi ariko atarabyazwa umusaruro uhagije. Yagaragaje ko ubufatanye n’amasosiyete mpuzamahanga afite ikoranabuhanga rigezweho bushobora gufasha mu kongera ubushobozi bw’igihugu mu bucukuzi, gutunganya amabuye y’agaciro no kongera agaciro kayo mbere yo koherezwa ku masoko mpuzamahanga.

Ku ruhande rw’amasosiyete y’Abanyamerika, abayobozi bayo bagaragaje ko bashishikajwe n’amahirwe y’ishoramari ari mu karere ka Afurika y’Iburasirazuba, cyane cyane mu gihugu cy’Uburundi gifite umutungo kamere urimo n’amabuye akenewe cyane mu ikoranabuhanga rigezweho n’inganda z’ingufu zisubira.

Abayobozi ba Amerika bitabiriye uyu muhango na bo bashimangiye ko ubufatanye nk’ubu bugamije guteza imbere ishoramari rifite inyungu ku mpande zombi, guteza imbere iterambere rirambye no kongera uruhare rw’ibigo by’Abanyamerika mu mishinga y’ubukungu muri Afurika.

Aya masezerano ateganyijwe gufasha mu guteza imbere ibikorwa byo gushakisha no gucukura amabuye y’agaciro mu Burundi, kuzana ikoranabuhanga rishya, kongera amahirwe y’akazi ku baturage ndetse no kongera umusaruro w’iyi sektori mu bukungu bw’igihugu.

Abasesenguzi mu by’ubukungu bavuga ko iyi mikoranire ishobora gutuma Uburundi burushaho kwinjira ku rwego mpuzamahanga mu bucuruzi bw’amabuye y’agaciro, mu gihe bukomeje gushaka abafatanyabikorwa mpuzamahanga bashobora gushora imari mu guteza imbere umutungo kamere wabwo.

Raul Nshungu- AMAHORONEWS.COM