UCL: PSG yanyagiye Barcelona, Liverpool na Man City na zo ziratsinda

Paris Saint-Germain yatsinze FC Barcelona ibitego 4-2, mu mukino w’umunsi wa gatatu wa UEFA Champions League wakinwe ku mugoroba wo ku wa 20 Ukwakira 2026.

Umukino wabereye kuri Parc des Princes i Paris watangiye amakipe yombi asatirana, ariko PSG iza gufungura amazamu ku munota wa 38, igitego gitsinzwe na Désiré Doué ku mupira yari ahawe na João Neves.

Barcelona yagerageje kwishyura mbere y’uko igice cya mbere kirangira, ariko amakipe yombi ajya kuruhuka PSG iyoboye n’igitego 1-0.

Mu gice cya kabiri, Barcelona yagarutse ishaka kwishyura, igitego iza kugitsinda ku munota wa 55, cyinjijwe na Xavi Espart, amakipe yombi anganya 1-1.

PSG yakomeje guhura n’ibibazo by’imvune, birimo iza Ousmane Dembélé, Khvicha Kvaratskhelia na kapiteni Marquinhos. Icyakora, yakomeje gusatira izamu rya Barcelona.

Ku munota wa 72, Lucas Hernandez yatsinze igitego cya kabiri cya PSG, mbere y’uko Lamine Yamal yishyurira Barcelona ku munota wa 79.

Vitinha yongeye gushyira PSG imbere ku munota wa 81, naho Fabián Ruiz atsinda igitego cya kane ku munota wa 86, ku mupira yari ahawe na Achraf Hakimi.

Umukino warangiye PSG itsinze ibitego 4-2, ikomeza kwitwara neza muri iri rushanwa.

Liverpool na Man City na zo ziratsinda

Mu yindi mikino, Liverpool yatsinze Villarreal ibitego 4-3, mu gihe Manchester City yanyagiye AEK Athens ibitego 5-1.

Atlético Madrid yanganyije na Stuttgart igitego 1-1 mu Budage, naho Napoli itsinda Bodø/Glimt ibitego 4-3.

AS Roma yatsinze Slovan Bratislava ibitego 4-0, mu gihe FC Porto yatsindiwe iwayo na PSV Eindhoven igitego 1-0.

Mu yindi mikino yabaye mbere, Borussia Dortmund yatsinze Sabah FK ibitego 2-1. Iyi kipe yo muri Azerbaijan ikinamo Umunyarwanda Joy Lance Mickels.

Fenerbahçe na Slavia Prague zanganyije ibitego 2-2.