Mali: Abanyarwanda n’Inshuti zabo bizihije umunsi wo Kwibohora ku nshuro ya 32

Ku mugoroba wa tariki 19 Nyakanga 2026 i Bamako, Abanyarwanda batuye muri Mali bifatanyije n’inshuti z’u Rwanda kwizihiza isabukuru ya 32 yo Kwibohora, mu gikorwa cyitabiriwe n’abahagarariye Guverinoma ya Mali, abahagarariye ibihugu byabo n’imiryango mpuzamahanga ndetse n’inshuti z’u Rwanda.

Uwari uhagarariye Guverinoma ya Mali muri ibi birori, Madamu Traoré Assiata Gaye, Umujyanama muri Minisiteri y’Ububanyi n’Amahanga n’Ubutwererane Mpuzamahanga, yagejeje ku Rwanda ubutumwa bw’ishimwe riturutse ku baturage na Guverinoma ya Mali kuri uyu munsi w’ingenzi mu mayeka y’u Rwanda.

Yishimiye umubano mwiza uri hagati y’ibihugu byombi ushingiye ku cyerekezo cy’abayobozi baharanira ko Abanyafurika bishakamo ibisubizo mu gukemura ibibazo biri ku mugabane wabo, anashima umubano mwiza uri hagati y’ibihugu byombi.

Umuyobozi w’Abanyarwanda batuye muri Mali, Alida Faraya yashimye ubutwari n’umutima wo gukunda Igihugu byaranze ingabo zari iza FPR-Inkotanyi zari ziyobowe na Perezida Paul Kagame zahagaritse Jenoside yakorerwaga Abatutsi mu 1994 zikanabohora u Rwanda.

Ati “Uko kwitanga kw’izo ngabo z’intwari kuzakomeza kubera urumuri abakiri bato uko ibihe bizagenda bisimburana, bagakomeza kurangwa n’indangagaciro z’ubudaheranwa, ubumwe, gukunda igihugu aribyo shingiro ry’iterambere igihugu kimaze kugeraho.”