Perezida Kagame yitabiriye inama yiga ku isanzure mu Bufaransa
Perezida wa Repubulika Paul Kagame ari i Paris mu Bufaransa, aho yifatanyije n’Abakuru b’Ibihugu na za Guverinoma ndetse n’abandi bayobozi batandukanye mu gutangiza Inama Mpuzamahanga yiga ku Isanzure, yateguwe ku bufatanye bw’u Bufaransa n’u Budage.
Iyi nama y’iminsi ibiri yatangiye kuri uyu wa Gatatu tariki ya 9 Nzeri 2026, ikazasozwa kuri uyu wa Kane tariki ya 10 Nzeri 2026.
Mu ngingo z’ingenzi ziri kuganirwaho muri iyi nama harimo umutekano n’ibikorwa bya gisirikare bikorerwa mu isanzure, ubukungu bushingiye ku isanzure, ndetse no kwihutisha ibiganiro n’ubutwererane mu rwego rwo guteza imbere imikoreshereze irambye y’isanzure, ku buryo igirira akamaro inyokomuntu.
By’umwihariko, abayitabiriye baribanda ku buryo ubukungu bushingiye ku isanzure bwatezwa imbere, ubuvumbuzi bwa siyansi bukorerwa muri uru rwego ndetse n’uburyo umutungo n’amahirwe biboneka mu isanzure byabyazwa umusaruro mu buryo burambye.
Ibiro bya Perezida Kagame byatangaje ko muri iyi nama harimo ibiganiro byibanda ku ntumbero ya Afurika n’umusanzu w’umugabane mu guharanira ahazaza h’isanzure.
Ibi biganiro byihariye kuri Afurika biteganyijwe kwibanda ku buryo umugabane ushobora kubyaza umusaruro ikoranabuhanga rigezweho rishingiye ku isanzure, ndetse n’uburyo iryo koranabuhanga ryafasha mu kwihutisha iterambere, kongera ubushobozi bwa siyansi n’ikoranabuhanga, no kugira uruhare mu kunoza imiyoborere y’isanzure Isi yose isangiye.
Muri urwo ruzinduko, Perezida Kagame kandi yahuye n’Umuyobozi Mukuru w’Ishami ry’Umuryango w’Abibumbye ryita ku Burezi, Ubumenyi n’Umuco (UNESCO), Khaled El-Enany, mbere y’uko bombi bitabira iyo nama.
Abayobozi bombi baganiriye ku bufatanye hagati y’u Rwanda na UNESCO mu nzego zitandukanye zirimo uburezi, ubumenyi n’ikoranabuhanga, umurage ndangamuco, ndetse n’uburyo bwo gusigasira inzibutso.
