MINALOC yahinduye imiterere y’imirimo ku rwego rw’Akagari, imishahara na yo irazamurwa

Aya mavugurura ateganya ko umubare w’abakozi bakorera ku Kagari uzava kuri babiri ukagera kuri batatu, hanavugururwa amazina y’imyanya imwe n’imwe y’imirimo n’inshingano zayo. Byongeye kandi, imishahara y’abo bakozi yarazamutse.

Mbere y’aya mavugurura, ku rwego rw’Akagari hakoraga abakozi babiri: Umunyamabanga Nshingwabikorwa w’Akagari n’umukozi ushinzwe iterambere ry’imibereho myiza n’ubukungu, uzwi nka SEDO (Social Economic Development Officer).

Mu rwego rwo kunoza imikorere, hiyongereyeho umwanya w’umukozi ushinzwe iterambere rya muntu n’imibereho myiza y’abaturage (Human Capital and Social Development Officer). Bityo, buri Kagari kazajya kagira abakozi batatu.

Hanahinduwe inyito y’umwanya wa SEDO, usigaye witwa umukozi ushinzwe iterambere ry’ubukungu (Economic Development Officer). Mu duce tw’imijyi, uwo mwanya uzajya witwa Urban-Economic Development Officer.

MINALOC yasobanuye ko izi mpinduka zigamije gutandukanya no gusobanura neza inshingano z’abakozi, kugira ngo ibikorwa bijyanye n’iterambere ry’ubukungu n’iby’imibereho myiza y’abaturage birusheho kwitabwaho. Umunyamabanga Nshingwabikorwa w’Akagari na we azakomeza kuba umwe mu bakozi batatu bazakorera kuri uru rwego.

Imishahara y’abakozi b’Utugari yarazamutse

Usibye kongera umubare w’abakozi no kuvugurura imyanya y’imirimo, aya mavugurura anajyanye no kunoza inshingano z’abakozi b’Utugari no kuzamura imishahara yabo.

MINALOC ivuga ko izi mpinduka zigamije kunoza imibereho y’abakozi no kubafasha kurushaho kuzuza inshingano zabo, bityo abaturage bakabona serivisi nziza kandi ku gihe.

Gusa, iyi Minisiteri ntiyagaragaje umubare w’amafaranga yiyongereye ku mushahara wa buri mukozi.

MINALOC yatangaje ko gahunda yo gushyira abakozi mu myanya ivuguruye yatangiye muri Nzeri 2026, ikaba ikomeje gushyirwa mu bikorwa mu Turere 27 two hanze y’Umujyi wa Kigali. Mu Mujyi wa Kigali, izi mpinduka zari zarashyizwe mu bikorwa mbere.

Mu gushyira mu bikorwa aya mavugurura, abakozi bari basanzwe bakora ku rwego rw’Akagari ni bo babanje gushyirwa mu myanya mishya, mu gihe hatangiye n’igikorwa cyo gushaka abandi bakozi binyuze mu mapiganwa.

Ibi bizafasha kuzuza imyanya yose iteganyijwe, kugira ngo buri Kagari kagire abakozi batatu bashobora gusohoza inshingano zabo uko bikwiye.

Aya mavugurura ari mu ngamba zo kunoza imikorere y’inzego z’ibanze, by’umwihariko ku rwego rw’Akagari, abaturage begereye cyane mu buzima bwa buri munsi. Biteganyijwe ko kongera abakozi, gusobanura neza inshingano zabo no kuzamura imishahara bizagira uruhare mu kunoza imitangire ya serivisi no kwihutisha izihabwa abaturage.