Gasabo: Icyicaro cy’Ishyaka ry’Ibidukikije muri "EAC" kigiye kubakwa mu Rwanda

Abahagarariye Amashyaka y’Icyatsi (Green Party) mu bihugu bigize Umuryango wa Afurika y’Iburasirazuba (EAC) bemeje ko bashyigikiye ko icyicaro cy’akarere cy’iri shyaka cyubakwa mu Rwanda, bashimangira umutekano, amahoro, iterambere rirambye n’imiyoborere myiza U Rwanda ruzwiho.

Ibi babigarutseho ku wa Gatandatu, tariki 26 Nyakanga 2025, mu nama yabereye mu Mujyi wa Kigali yahurije hamwe abanyamuryango b’amashyaka yita ku kurengera ibidukikije no guteza imbere ubufatanye mu karere.

Iyi nama yari igamije gushimangira ubufatanye mu gukomeza kubaka amashyaka y’icyatsi no guteza imbere politiki zibungabunga ibidukikije, bikagirira akamaro abanyamuryango n’abaturage bose muri rusange.

Anne Marie Bihirabake, uhagarariye ishyaka ry’icyatsi mu Burundi, yavuze ko baganiriye ku ngingo zirimo imihindagurikire y’ibihe, kurengera ibidukikije n’uburyo amashyaka y’icyatsi yakomeza kwiyubaka.

Anne Marie Bihirabake, uwa kabiri uturutse iburyo wicaye, uhagarariye Ishyaka ry’Icyatsi mu Burundi

Ati, “Turifuza ko buri wese ahaguruka tugafatanya kubaka ibihugu byacu no kurinda akarere. Tugomba no gukangurira abaturage bose uruhare rwabo kugira ngo ntawe usigara inyuma mu guhangana n’ingaruka z’imihindagurikire y’ibihe.”

Mohamed Mohamoud, Umuyobozi w’ishyaka ry’icyatsi muri Somaliya, na we yashimye U Rwanda nk’igihugu cy’intangarugero mu miyoborere, asaba ko icyicaro cya Green Party mu Karere cyimurirwa i Kigali.

Mohamed Mohamoud, Umuyobozi w’ishyaka ry’icyatsi muri Somaliya

Yavuze ati, “U Rwanda ni igihugu gikomeje kugaragaza ubwitange mu kurengera ibidukikije, guteza imbere demokarasi n’ubwuzuzanye. Kuba icyicaro cyubakwa hano ni igitekerezo cyiza kuko hari amahoro, iterambere n’imiyoborere myiza. Turashimira cyane ubuyobozi bw’u Rwanda n’imigambi yarwo y’indashyikirwa.”

Depite Dr. Frank Habineza, Perezida w’Ishyaka Riharanira Demokarasi no Kurengera Ibidukikije mu Rwanda, yavuze ko kubaka icyicaro cya Green Party mu Rwanda bizagira akamaro gakomeye ku banyamuryango ndetse no ku baturage bose.

Depite Dr. Frank Habineza, Perezida w’Ishyaka Riharanira Demokarasi no Kurengera Ibidukikije mu Rwanda

Yagize ati: “Ibi bizatuma ibikorwa byinshi by’iri shyaka bizajya bibera mu Rwanda, bityo bigateza imbere igihugu no kurushaho kukigira igicumbi cy’imishinga itandukanye yo kubungabunga ibidukikije muri Afurika.”

Iyi nama yitabiriwe n’intumwa ziturutse mu mashyaka y’icyatsi yo mu bihugu birimo u Rwanda, Kenya, Burundi, Uganda na Somalia.