Inama Mpuzamahanga y’ibinyabuzimafatizo n’Ubuvuzi igeze i Kigali
Kuva ku wa 15 kugeza ku wa 17 Ukwakira 2025, Umujyi wa Kigali uzakira inama mpuzamahanga y’iminsi itatu izahuza inzobere mu bijyanye n’ibinyabuzimafatizo (Genomics) n’ubumenyi bushingiye ku ikoranabuhanga mu buvuzi. Iyo nama izabera muri Kigali Convention Centre (KCC), ikazitabirwa n’impuguke ziturutse mu bihugu bitandukanye byo ku migabane itandukanye.
Abahanga mu by’ibinyabuzimafatizo bagiye guhurira i Kigali mu Nama Mpuzamahanga
Iyi nama yateguwe n’Umuryango utegamiye kuri Leta “Goodlife Access”, ku bufatanye na Minisiteri y’Ubuzima (MINISANTE), Rwanda Biomedical Centre (RBC), Kigali International University of Health Sciences (KIUHS) ndetse n’abafatanyabikorwa barimo BioAfrica Initiative, Mastercard Foundation, na Rwanda Development Board (RDB).
Intego n’icyo inama igamije
Iyi nama izibanda ku bumenyi bwa “Genomics” bushobora guhindura imikorere y’ubuvuzi kuva ku rwego rw’umuntu ku giti cye (individual) kugeza ku rwego rw’ubuzima rusange.
Hazaganirwa ku ngingo zirimo ikoreshwa ry’ibikoresho by’ikoranabuhanga mu gusuzuma no kuvura indwara, guteza imbere ubuvuzi bwihariye (Personalized medicine), n’uburyo amakuru y’ibinyabuzima (biological data) ashobora gufasha mu gukumira indwara mbere y’uko zikaza.
Jean-Baptiste Mazarati, Perezida w’Inama y’Ubutegetsi bwa “Goodlife Access”, yavuze ko iyi nama izaba umwanya w’amateka ku rwego rw’ubuvuzi muri Afurika.
Jean-Baptiste Mazarati
Ati, “Iyi si inama ya siyansi gusa, ahubwo ni intambwe ikomeye mu rugendo rwo guhuza ubumenyi, ikoranabuhanga n’ubushakashatsi, hagamijwe kuzana ibisubizo bifatika mu buzima bw’abantu,”
U Rwanda rwahiswemo kubera intambwe rufite mu ikoranabuhanga
Abategura iyi nama batangaje ko bahisemo u Rwanda kubera uburyo rugaragaza icyerekezo gikomeye mu guteza imbere ubuvuzi bushingiye ku ikoranabuhanga.
U Rwanda ruri mu bihugu bike bya Afurika byamaze gushyira mu bikorwa ikoreshwa ry’indege zitagira abapilote (drones) mu gutwara imiti, amaraso n’inkingo, ndetse rukaba rwarashoye mu bushakashatsi bujyanye n’ikorabuhanga mu buvuzi.
Gahunda y’ahazaza mu buvuzi bwa Afurika
“Goodlife Genomics” ni gahunda nshya yashinzwe na “Goodlife Access”, igamije guteza imbere ubushakashatsi n’ikorabuhanga mu bijyanye n’ibinyabuzimafatizo, “bioinformatics”, no guhanga udushya mu buvuzi bwihariye ku muntu.
Iyi gahunda ishyigikiwe n’abafatanyabikorwa batandukanye barimo “African Union Scientific Council”, “Rwanda Innovation Fund”, na “UNDP Rwanda”.
Biteganyijwe ko inama izasiga hasinywe amasezerano y’ubufatanye hagati y’inzego zitandukanye z’ubuzima mu Rwanda n’abafatanyabikorwa mpuzamahanga, mu rwego rwo kongerera ubushobozi ibigo by’ubushakashatsi bwo muri Afurika.
Iyi nama izaba ari n’umwanya wo guhuza abashoramari n’inzego z’ubuzima mu kurebera hamwe uburyo bushya bwo guteza imbere ubuvuzi bushingiye ku bumenyi bwa “Genomics”, hagamijwe kuzana ibisubizo bijyanye n’igihe no kongera icyizere mu rwego rw’ubuzima ku mugabane wa Afurika.
Icyitonderwa:
Abifuza kwitabira inama bashobora gusura urubuga rwa www.goodlifeaccess.org/genomics2025 cyangwa bakandikira kuri info@goodlifeaccess.org kugira ngo biyandikishe mbere ya tariki ya 10 Ukwakira 2025.
Amani Ntakandi – Amahoronews.com
