Agera kuri miliyari 30 Frw yatanzwe nk’ingurane mu kwagura umuhanda Giporoso-Masaka

Ikigo cy’Igihugu gishinzwe Iterambere rya Transport (RTDA) cyatangaje ko hamaze kwishyurwa arenga miliyari 30 Frw y’ingurane z’imitungo izimurwa kubera umushinga wo kwagura no kuvugurura umuhanda Prince House-Giporoso-Masaka, uzatwara amafaranga arenga miliyari 130 Frw.

RTDA yavuze ko imitungo isaga 530 ari yo yagenwe ko igomba kwishyurwa ingurane mbere y’uko ibikorwa byo kwagura uyu muhanda bikomeza.

Uyu mushinga uzavugurura umuhanda ufite uburebure bwa kilometero 10,4, ukazibandaho kwagura ibice byawo, kubaka ibiraro n’imiyoboro y’amazi, gushyiraho amatara yo ku muhanda no kunoza uburyo bwo gucunga urujya n’uruza rw’ibinyabiziga.

Uyu muhanda uri mu mishinga y’ibikorwaremezo by’imijyi iterwa inkunga binyuze mu bufatanye hagati y’u Rwanda n’u Bushinwa.

Mu nkunga y’uyu mushinga, u Bushinwa bwatanze miliyari 95 Frw, mu gihe Guverinoma y’u Rwanda izatanga miliyari 35 Frw.

Igice cya mbere cy’umuhanda gifite kilometero 1,37 kizavugururwa kivuye ku muhanda w’imirongo ibiri kikaba umuhanda w’ibisate bine. Ikindi gice gifite kilometero 9,04 na cyo kizagurwa kikagira ibisate bine.

Imirimo yo kwagura no kuvugurura uyu muhanda yatangiye ku wa 30 Kanama 2026, ikaba iteganyijwe kumara amezi 30, ni ukuvuga imyaka ibiri n’igice.

Basabye ko imirimo yihutishwa

Umunyamabanga wa Leta muri Minisiteri y’Ibikorwaremezo, Col Claudien Bizimungu, yasabye abari muri uyu mushinga gukora ibishoboka byose kugira ngo imirimo irangire mbere y’igihe cyagenwe.

Yavuze ko nubwo amasezerano ateganya ko imirimo izamara amezi 30, hari icyizere ko ishobora kurangizwa mu mezi 15 cyangwa 20, bitewe n’imbaraga zizashyirwa mu bikorwa by’uyu mushinga.

Ati: “Hari ibiteganywa mu masezerano y’uko umuhanda ugomba kurangira mu mezi 30, ariko turasaba kandi birashoboka mu bufatanye bwacu n’abagiye kutwubakira ko byihutirwa abantu bakabirangiza mu gihe gito gishoboka kugira ngo abaturage, abakoresha uyu muhanda haba abajya ku kazi, abajyana abana ku ishuri n’abandi bongere kuwukoresha.”

Uyu muhanda wa Prince House-Giporoso-Masaka ni umwe mu mihanda ikoreshwa cyane mu Mujyi wa Kigali, aho kwagurwa kwawo biteganyijwe gufasha kugabanya ubucucike bw’imodoka no koroshya ingendo hagati y’uduce dutandukanye two mu Mujyi.

U Bushinwa bwashimye ubufatanye n’u Rwanda

Ambasaderi w’u Bushinwa mu Rwanda, Gao Wenqi, yavuze ko yishimiye ko ubufatanye hagati ya Guverinoma y’u Rwanda n’u Bushinwa mu guteza imbere ibikorwaremezo by’ubwikorezi no gushyigikira iterambere rirambye bukomeje gukomera.

Yavuze ko imishinga nk’uyu muhanda ndetse n’ibindi bikorwa by’ibikorwaremezo byitezweho kugira uruhare mu guteza imbere imibereho y’abaturage n’ubukungu bw’igihugu.

Mu minsi ishize, Ambasade y’u Bushinwa mu Rwanda yashyikirije Minisiteri y’Ubuzima Ibitaro bya Masaka bivuguruye, nyuma yimukirwamo Ibitaro bya Kaminuza bya Kigali.

Ambasaderi Gao Wenqi yavuze ko ibitaro ari ingenzi mu kurinda ubuzima bw’abaturage, mu gihe imihanda na yo ifite uruhare mu koroshya ingendo no guteza imbere ibikorwa by’ubukungu.

Ati: “Mu bitaro ni ho abantu bivuriza indwara zitandukanye bikaba byabafasha kurinda ubuzima bwabo. Ikindi ni uyu muhanda twatangije ku mugaragaro ibikorwa byo kuwubaka, ukaba uteganyijwe ko uzagira uruhare mu izamuka ry’ubukungu bw’igihugu.”

Uyu muhanda uzakorwa mu gihe cy’amezi 30

Raoul Nshungu- Amahoronews.com