Kwibuka 31: Urubyiruko rwiga imyuga y’ubwiza n’abakozi b’amahoteli n’amaresitora bibutse Jenoside yakorewe Abatutsi

Kwibuka ku nshuro ya 31, Urubyiruko rwiga gutunganya imisatsi, inzara n’ubwiza muri Kimisigara, ku bufatanye n’abakozi bo mu mahoteli n’amaresitora, rwitabiriye igikorwa cyo kwibuka Jenoside yakorewe Abatutsi

Urubyiruko rusaga 500 rwiga imyuga ijyanye no gutunganya imisatsi, inzara n’ubwiza mu kigo cya Kimisigara, ku bufatanye n’abakozi b’amahoteli n’amaresitora, rwitabiriye igikorwa cyo kwibuka Jenoside yakorewe Abatutsi cyabereye ku Rwibutso rwa Jenoside rwa Kigali.

Abitabiriye iki gikorwa basobanuye ko kwibuka atari inshingano z’inzego z’ubuyobozi gusa, ahubwo ari umwihariko wa buri Munyarwanda.

Umwe mu rubyiruko rwari rwitabiriye icyo gikorwa yagize ati, “Kwibuka ni inshingano yacu twese nk’Abanyarwanda. Tugomba kubikora natwe ubwacu, ndetse n’abanyamahanga batugana bagasobanukirwa ko Jenoside yakorewe Abatutsi atari inkuru mpimbano. By’umwihariko, urubyiruko rugomba gusura inzibutso, rukamenya amateka y’ibyabaye, ndetse rugasobanukirwa n’ubuhamya bw’ababirokotse.”

Muhire Jean Bosco, Umuyobozi ushinzwe abakozi muri Hotel Lemigo, wanabayeho mu gihe cya Jenoside, yasangije abari aho ubuhamya bw’uko umuryango we wose waguye muri Jenoside.

Yagize ati, “Ni yo mpamvu abakozi bashya binjira mu kazi kacu, cyane cyane urubyiruko tugomba kubigisha amateka ya Jenoside no kubarinda ingengabitekerezo yayo.”

Muhire Jean Bosco, Umuyobozi ushinzwe abakozi muri Hotel Lemigo

Yongeyeho ati, “Kwiga amateka bidufasha gukora neza, tuzi aho igihugu cyacu cyavuye. Dusaba urubyiruko gukoresha ikoranabuhanga mu kurwanya ingengabitekerezo ya Jenoside, ndetse bakanasubiza abayihembera ku mbuga nkoranyambaga.”

Uwurukundo Aline, wiga gutunganya imisatsi, inzara n’ubwiza i Kimisigara, yavuze ko ari bwo bwa mbere yari ageze ku Rwibutso rwa Jenoside rwa Kigali.

Uwurukundo Aline, wiga gutunganya imisatsi, inzara n’ubwiza i Kimisigara

Yagize ati, “Nungutse byinshi. Nasuye ibyumba bitandukanye, numva n’ubuhamya. Nasobanukiwe ko Jenoside yakorewe Abatutsi yateguwe. Ndasaba bagenzi banjye bataragera ku Rwibutso kurusura kugira ngo basobanukirwe n’amateka, barebe n’akarengane kabayeho.”

Yongeyeho ati, “Rubyiruko ntituzongere gushukwa. N’abanyamahanga bagize uruhare muri Jenoside, ntitugomba kubibagirwa. Dukwiye gukorera igihugu cyacu kandi tugaharanira kuzirikana umuco wacyo.”

Uwase Solange, wiga iby’ubwiza i Kimisigara, yavuze ko mbere bigishwaga amateka ya Jenoside mu buryo rusange, ariko gusura Urwibutso byamuhaye ishusho nyayo y’ibyabaye.

Uwase Solange, wiga iby’ubwiza i Kimisigara

Yagize ati, “Ubu nibwo mbonye ukuri ku mateka y’igihugu cyacu. Twifuza no kujya duhumuriza abacitse ku icumu, kuko amateka yabo atagomba guheranwa ahubwo agomba kubahwa.”

Rushigajiki Haruna, Umunyamabanga Mukuru wa Sendika y’abakora imisatsi, inzara n’ubwiza, yavuze ko bafite intego yo guhugura urubyiruko ku mateka ya Jenoside no kurutoza indangagaciro.

Rushigajiki Haruna, Umunyamabanga Mukuru wa Sendika y’abakora imisatsi, inzara n’ubwiza

Yagize ati, “Ni ngombwa ko urubyiruko rumenya aho u Rwanda rwavuye, kugira ngo rubashe kurusigasira. Tugira uruhare mu kurutoza imyuga, kurufasha kwihangira imirimo, ariko kandi tunarutoza indangagaciro zishingiye ku muco nyarwanda n’ubutwari bushingiye ku bumuntu.”

Intumwa ya Minisiteri y’Ubumwe bw’Abanyarwanda n’Ubwiyunge (MINUBUMWE), yari ihagarariye iyi gahunda, yasabye urubyiruko kugira uruhare rufatika mu bikorwa byo kwibuka no kubaka ubumwe.

Yagize ati, “Insanganyamatsiko y’uyu mwaka igira iti: “Kwibuka byiyongera no kwigira biciyemo ubumwe nyakuri”. Rubyiruko, mumenye ko Jenoside yakorewe Abatutsi yateguwe igihe kirekire. Abavuga ko yatewe n’ihanurwa ry’indege ya Habyarimana ni ababeshya, kuko imaze kugwa, Abatutsi batangiye kwicwa bazira uko baremwe.”

Yashoje yibutsa ko amacakubiri yatangiye kugaragara kuva mu 1959, ubwo bamwe mu Banyarwanda batangiye guhunga igihugu, abandi bagahinduka impunzi mu gihugu cyabo. Uko gukandamizwa kwarushijeho gukaza umurego kugeza ubwo FPR Inkotanyi yahagaritse Jenoside mu 1994, ikanabohora igihugu.